ច័ន្ទ 20 មិថុនា 2011 2:31 PM
ខណៈពេលដែលថ្ងៃសវនាការដំបូងចំពោះសំណុំរឿង០០២នឹងមកដល់នៅសប្តាហ៏ក្រោយនេះ ក្រុមមេធាវីដែលតំណាងឲ្យលោក អៀង សារី អតីតរដ្ឋមន្រ្តីការបរទេសក្នុងរបបខ្មែរក្រហមបានដាក់ញត្តិមួយទៅកាន់សាលាក្តីខ្មែរក្រហម ដោយធ្វើការទាមទារឲ្យសាលាក្តីកូនកាត់មួយនេះ បកស្រាយអំពីមូលហេតុដែលមិនធ្វើការកោះហៅលោក ហ៊ុន សែន និងទ្រង់ នរោត្តម រណប្ញទ្ធិ ដែលជាអតីតនាយករដ្ឋមន្រ្តីទី១ មកផ្តល់សក្ខីកម្មនៅសវនាការខាងមុខនេះ។
អៀង សារី អតីតរដ្ឋមន្រ្តីការបរទេសនៃរបបខ្មែរក្រហម
ក្រុមមេធាវីដែលតំណាងឲ្យលោក អៀង សារី បានលើកឡើងនៅក្នុងញត្តិនោះថា ចៅក្រមជំនុំជម្រះគួរតែបញ្ជាក់ពីពេលវេលាដែលសាក្សីទាំងអស់ត្រូវផ្តល់សក្ខីកម្ម និងពន្យល់ពីមូលហេតុដែលសាក្សីទាំងនោះមិនត្រូវបានកោះហៅឲ្យចូលខ្លួននៅសវនាការសប្តាហ៍ក្រោយ។
កាលពីខែមុនក្រុមមេធាវីការពារក្តីឲ្យ អៀង សារី បានស្នើសុំទៅកាន់តុលាការឲ្យធ្វើការកោះហៅលោក ហ៊ុន សែន ទ្រង់ នរោត្តម រណប្ញទ្ធិ អតីតព្រះមហាក្សត្រ នរោត្តម សីហនុ និងលោក ជា ស៊ីម ឲ្យឡើងមកផ្តល់សក្ខីកម្មនៅក្នុងសវនាការនាសប្តាយ៍ក្រោយនេះ ដើម្បីបញ្ជាក់ពីគោលបំណងរបស់រដ្ឋាភិបាលក្នុងការផ្តល់ការលើកលែងទោសនោះ។
គួរបញ្ជាក់ថា ចាប់តាំងពីឆ្នាំ២០០៨មក ក្រុមមេធាវីដែលការពារក្តីឲ្យលោក អៀង សារី បានលើកឡើងថា កូនក្តីរបស់ខ្លួនមិនអាចទទួលទោសបានឡើយ ដោយសារតែគាត់ទទួលបានការលើកលែងទោសក្នុងឆ្នាំ១៩៩៦ ដែលត្រូវបានផ្តល់តាមសំណើរបស់រដ្ឋាភិបាលដែលគ្រានោះមាន ទ្រង់ នរោត្តម រណប្ញទ្ធិ ជានាយករដ្ឋមន្រ្តីទី១ និងលោក ហ៊ុន សែន ជានាយករដ្ឋមន្រ្តីទី២ អំឡុងពេលការចុះចូលរបស់កងកម្លាំងខ្មែរក្រហមនោះ។
ប៉ុន្តែទោះជាយ៉ាងណាក៏ដោយក្រុមព្រះរាជអាជ្ញារបស់សាលាក្តីខ្មែរក្រហមបានធ្វើការជំទាស់ចំពោះការលើកឡើងរបស់ក្រុមមេធាវីការពារក្តីឲ្យលោក អៀង សារី នោះ ដោយថា ការលើកលែងទោសនោះមិនសំដៅការពារលោក អៀង សារី ពីទោសព្រហ្មទណ្ឌតាមច្បាប់អន្តរជាតិទេ ហើយថា ការលើកលែងទោសសម្រាប់ឧក្រិដ្ឋកម្មនានាដូចជាអំពើប្រល័យពូជសាសន៍ជាដើមនោះ មិនត្រូវបានទទួលស្គាល់ឡើយតាមច្បាប់អន្តរជាតិ៕
No comments:
Post a Comment