ដោយ : រតនា
ថ្ងៃទី 15 មិថុនា 2011
CEN
ភ្នំពេញ: អាជ្ញាធរប្រេងកាតជាតិកម្ពុជាបានចុះហត្ថលេខាលើកិច្ចព្រមព្រៀងគោលស្តីពីការសិក្សាលទ្ធភាពសាងសង់រោងចម្រាញ់ប្រេងកាតជាមួយក្រុមហ៊ុន ខេមបូឌាន ភីត្រូ ខេមីខល ខូអិលធីឌី (Cambodian Petrochemical Co.Ltd) ដែលជាក្រុមហ៊ុនចម្រុះកម្ពុជាចិន។ ពិធីចុះហត្ថលេខាត្រូវបានធ្វើឡើងនៅល្ងាចថ្ងៃទី១៥ មិថុនានេះនៅទីស្តីការ គណៈរដ្ឋមន្ត្រីដោយមានវត្តមានលោកឧបនាយករដ្ឋមន្ត្រី សុខ អាន រដ្ឋមន្ត្រីទីស្តីការគណៈរដ្ឋមន្ត្រី ។
រោងចក្រនេះនឹងសាងសង់លើផ្ទៃដី ៨០ ហ.ត នៅក្នុងខេត្តកំពត។ ក្រុមហ៊ុននេះមិន ទាន់បានទម្លាយឲ្យដឹងអំពីដើមទុនដែលត្រូវវិនិយោគនៅឡើយទេ ដោយគ្រាន់តែអះអាងថា តម្លៃឈ្នួលសម្រាប់អ្នកជំនាញឌីហ្សាញរោងចក្រនេះត្រូវចំណាយ៣លាន ដុល្លារ។ លោកសុខ អាន បានឲ្យដឹងថា រោងចក្រនេះមានសមត្ថភាពអាចផលិតប្រេងបាន៥លានតោន ឬ លើសពីនេះក្នុង ១ឆ្នាំ។ ប្រេងដែលផលិតបានមានគុណភាពល្អ និងតម្លៃថោកជាងប្រេងនាំចូល។
លោកសុខ អានឲ្យដឹងទៀតថា ក្រុមហ៊ុន ឈីវរ៉ន (Chevron) របស់អាមេរិកបានរកឃើញអណ្តូងប្រេងតូចចំនួន ៣ នៅក្នុងឈូងសមុទ្រ កម្ពុជា ដោយចំណាយថវិកា ១៥០ លានដុល្លារហើយក្រុមហ៊ុនចិនគ្រោងចំណាយ ៦០០លានដុល្លារទៀតដើម្បីធ្វើអាជីវកម្មប្រេងកាតទាំងនោះ។ ការផលិតប្រេងនឹងចាប់ផ្តើមនៅចុងឆ្នាំ២០១២។ បើតាមលោកសុខ អាន កម្ពុជាប្រើប្រាស់ប្រេងមួយលានតោនក្នុង១ឆ្នាំ។ ដូច្នេះ ការផលិតប្រេងបាន៥លានតោន នឹងកាត់បន្ថយការនាំចូល កាត់បន្ថយភាពក្រីក្រ និងផ្តល់ការងារជូនពលរដ្ឋជាច្រើន៕
No comments:
Post a Comment