អ្នកភូមិខេត្តកំពង់ស្ពឺ៤នាក់ ត្រូវបានប៉ូលិសវាយសំពងនឹងដំបងឆក់ អំឡុងពេលរារាំងមិនឲ្យក្រុមហ៊ុនឈូសឆាយដីស្រែ
ថ្ងៃព្រហស្បតិ៍ 27 មករា 2011 9:18 AM | ដោយ ៖ មាស មុន្នី 
អំឡុងដែលអ្នកភូមិមួយផ្នែក នៅក្នុងទំនាស់ដីធ្លីជាមួយក្រុមហ៊ុន Master International Group លើកគ្នាមកធ្វើការតវ៉ានៅទីក្រុងភ្នំពេញ អ្នកភូមិរាប់រយនាក់ផ្សេងទៀតបានធ្វើការហាមឃាត់មិនឲ្យគ្រឿង ចក្ររបស់ក្រុមហ៊ុននេះឈូសឆាយដីស្រែរបស់ពួកគាត់។ ការរារាំងបាននាំទៅដល់ការប៉ះទង្គិចគ្នាដោយអំពើហឹង្សា ដែលក្នុងនោះ អ្នកភូមិយ៉ាងហោចណាស់៤នាក់ត្រូវបានក្រុមសន្តិសុខក្រុមហ៊ុន ក៏ដូចជាប៉ូលិស និងប៉េអឹម វាយសំពងនឹងដំបងឆក់ ឲ្យទទួលរងរបួសជាទម្ងន់។ 
ការបង្រ្កាបរបស់សមត្ថកិច្ចទៅលើប្រជាពលរដ្ឋក្នុងជម្លោះដីធ្លី
ជម្លោះដីធ្លី៩៥០ហិកតា រវាងប្រជាពលរដ្ឋរស់នៅក្នុងឃុំតាំងសំរោង ស្រុកភ្នំស្រួច ខេត្តកំពង់ស្ពឺ ជាមួយក្រុមហ៊ុន Master International Group បានផ្ទុះឡើងតាំងតែពីឆ្នាំ២០០៨ នៅពេលដែលគណៈរដ្ឋមន្រ្តី នៃប្រទេសកម្ពុជាបានសម្រេចប្រគល់ទំហំដីនេះ ទៅឲ្យក្រុមហ៊ុន ហើយក្រុមហ៊ុនបានឈូសឆាយធ្វើឲ្យប៉ះពាល់ដល់ដីស្រែប្រជាពលរដ្ឋ។ ក្រុមអ្នកភូមិបានលើកគ្នាមកធ្វើការតវ៉ានៅទីក្រុងភ្នំពេញ ដើម្បីឲ្យនាយករដ្ឋមន្រ្តី ហ៊ុន សែន ជួយអន្តរាគមន៏ដោះស្រាយ ប៉ុន្តែចំនួនពីរលើកហើយ ចំណារអន្តរាគមន៏ដែលពលរដ្ឋទទួលបានពីខុន្ទកាល័យ ហ៊ុន សែន ពុំមានប្រសិទ្ធិភាព ដើម្បីឲ្យក្រុមហ៊ុន និងអាជ្ញាធរមូលដ្ឋាននៅកន្លែងដែលមានទំនាស់នោះ អនុវត្តតាមឡើយ៕
No comments:
Post a Comment