សរសើរខ្លាំងពេកខ្វះការពិត របស់លោក ផៃ ស៊ីផាន ទៅជារឿងចាប់ជើង ហ៊ុន សែន បោកដូចកង្កែប
ថ្ងៃព្រហស្បតិ៍ 27 មករា 2011 10:22 AM | ដោយ ៖ ស សូរ្យកាន្ត 
នៅក្នុងកម្មវិធីឆ្លើយឆ្លងតាមទូរស័ព្ទ របស់វិទ្យុអាស៊ីសេរីកាលពីយប់ថ្ងៃអង្គារ ទី២៥ មករា ដែលគេដឹងថា អ្នកហៅចូលភាគច្រើនសុទ្ធសឹងតែជាមនុស្សគាំទ្របក្សប្រជាជន ដែលហាក់ដូចជាដឹងម៉ូរប្រាប់គ្នាមុននោះ គេឃើញលោក ផៃ ស៊ីផាន ជាអ្នកនយោបាយហក់លោត ដែលជាវាគ្មិនបានឆ្លៀតឱកាសលើកជើងសរសើរ ហ៊ុន សែន ស្ទើរតែផុតក្បាលតែម្តង។ ហើយអ្វីដែលគាត់ចេះតែសរសើរ ហ៊ុន សែន វ៉ាប់យកៗនេះ ត្រូវបានគេមើលឃើញថា គាត់ហាក់ដូចជាធ្វើឱ្យនាយករដ្ឋមន្ត្រីគាត់អស់ជំហរ អុកគូថទល់ផ្អក ឬក៏ហាក់ដូចជា ចាប់ជើង ហ៊ុន សែន បោកផោះៗដូចកង្កែបតែម្តង។ ហើយអ្វីដែលគេនឹកឃើញហួសចិត្តខ្លាំងពេកនោះ គឺនៅពេលលោក ផៃ ស៊ីផាន ដែលបច្ចុប្បន្នទទួលខ្លួនជាអ្នកស៊ីឈ្នួលបញ្ចោញប្រតិកម្មជំនួស ហ៊ុន សែន នោះ គឺការដែលគាត់នេះបាននិយាយទាញយក ហ៊ុន សែន ពីបាតអណ្តូង មកប្រៀបធៀបគុណសម្បត្តិជាមួយប្រធានាធិបតីសហរដ្ឋអាមេរិក បារ៉ាក់ អូបាម៉ា ថា នាយករដ្ឋមន្ត្រីដែលមានអតីតភាពជាកូនឈ្លបខ្មែរក្រហមម្នាក់នេះ មានគុណសម្បត្តិឡូយជាង អូបាម៉ា បើតាមការស្ទង់មតិ។ លោក ផាន បាននិយាយថា តាមការស្ទង់មតិនៅអាមេរិក គេឃើញថា ការគាំទ្ររបស់ពលរដ្ឋអាមេរិកទៅលើបេក្ខភាពលោក អូបាម៉ា ឃើញធ្លាក់តែរហូត ខុសពីលោក ហ៊ុន សែន នាយករដ្ឋមន្ត្រីខ្មែរ ដែលតាមរបាយការណ៍ស្ទង់មតិធ្វើដោយ IRI កាលពីពេលថ្មីៗរកឃើញថា លោក ហ៊ុន សែន ទទួលបានប្រជាប្រិយភាពពីពលរដ្ឋខ្មែររហូតដល់៧៦ភាគរយឯហ្នុះ។
ការនិយាយបែបនេះ បានធ្វើឱ្យមជ្ឈដ្ឋានប្រជាពលរដ្ឋខ្មែរខ្លះនឹកចង់ឈឺសើចចំពោះការ ធ្មិចភ្នែកលើកជើងនាយករដ្ឋមន្ត្រីរបស់លោក ផៃ ស៊ីផាន ថាវាហាក់ដូចជារឿងលើកជើងហួសប្រមាណពេក នៅពេលដែលប្រធានាធិបតី អូបាម៉ា របស់អាមេរិកមាន សមត្ថភាពចំណេះដឹងខ្ពង់ខ្ពស់ជាមេដឹកនាំនៃប្រទេសមហាអំណាចពិភពលោក តែបែរជាខ្លួនខំប្រឹងព្យាយាមលើក មេដឹកនាំនៃប្រទេសដ៏ក្រីក្របែបភក់ជ្រាំយកទៅបន្តុបពីលើ ដែលបែបនេះវាទៅជាការបង្អាប់ បង្អោនដល់មុខមាត់របស់គាត់ទៅវិញ។ គឺខណៈដែលនាយករដ្ឋមន្ត្រីខ្មែរ ហ៊ុន សែន ជាញយដងត្រូវបានគេកត់សម្គាល់ឃើញថា ហ៊ានលួចសរសើររបបរបស់គាត់ ដោយប្រុងប្រយ័ត្ន តែជាមួយរបបខ្មែរក្រហមដ៏លីលាតែប៉ុណ្ណោះ។
នេះបើតាមការពិនិត្យឱ្យដិតដល់ កន្លែងខ្លះនៃការគ្រប់គ្រងអំណាចរបស់បក្សប្រជាជន កម្ពុជាបច្ចុប្បន្ន ដូចជាយ៉ាប់ធ្ងន់ជាងពួកខ្មែរក្រហមទៀតផង បើលើកលែងតែពីការសម្លាប់មនុស្សមួយមុខចេញនោះ។ ដូចជាអំពើពុករលួយដ៏រីករាលដាល ភាពអយុត្តិធម៌ក្នុងសង្គម គំលាតជីវភាពខុសគ្នាឆ្ងាយ រវាងអ្នកមាន និងអ្នកក្រ ការបំផ្លាញសម្បត្តិធម្មជាតិ៘ និង ៘ ដែលកាលសម័យខ្មែរក្រហមពីឆ្នាំ១៩៧៥-១៩៧៩ គេឃើញថា ជីវភាពរបស់មនុស្សនាពេលនោះ រាប់ទាំងពី ប៉ុល ពត ខ្លួនឯងផង មានជីវភាពរស់នៅ របបទទួលទាន មិនលើសពីពលរដ្ឋសាមញ្ញដែលជាទាសករនៃរបបរបស់គេប៉ុន្មានទេ។
ស្តេច នរោត្តម សីហនុ អតីតព្រះមហាក្សត្រនៃប្រទេសកម្ពុជា ដែលត្រូវបានអនុញ្ញាតិ ឱ្យរស់នៅក្នុងវាំងកាលនោះ ព្រះអង្គធ្លាប់មានបន្ទូលជាសាធារណៈថា ព្រះអង្គ និងព្រះមហេសី ក៏ត្រូវបានគេឱ្យប្រើប្រាស់សម្លៀកបំពាក់ពណ៌ខ្មៅ ហើយកាន់ចបបង្គីធ្វើពលកម្មជំរះ ស្មៅនៅក្នុងវាំងដូចជាប្រជារាស្ត្រជាកូនចៅឯទៀតដែរ។ ហើយជាញឹកញាប់ ព្រះអង្គបាន សោយសម្លរម្ជូរដើមចេកជាមួយត្រីចង្វារដែលទាហានខ្មែរក្រហមបានអូសពីទន្លេ។ ចំណែកនៅតាមមូលដ្ឋានវិញ បើគេរកឃើញថា មេសហករណ៍ ឬមេឃុំណាម្នាក់ដែលហ៊ានតែលួចពមបាយមួយដុំលើសពីពលរដ្ឋសាមញ្ញនោះ ប្រាកដជាអង្គការយកទៅសម្លេះចោលហើយ។ ចំណែកឯសម្បត្តិធម្មជាតិដូចជាត្រី រ៉ែក្រោមដីផង គឺនៅទាំងដុលតែម្តង គ្មានរបេះរបូតអ្វីទេ ចំណែកជនអន្តោប្រវេសន៍យួនវិញ គឺមិនបាច់និយាយឡើយ សូម្បីតែពលរដ្ឋខ្មែរខ្លះដែលមានរូបរាងកាយដូចយួន ក៏អត់ទុកដែរ។ ហើយខាងព្រំដែនក៏ដូច្នេះដែរ គឺគ្មានអ្នកណាម្នាក់ដែលជាសត្រូវរបស់ខ្មែរក្រហម ទាំងពេលដែលខ្មែរ ក្រហមកំពុងកាន់អំណាច រហូតមកដល់ពេលនេះ ហ៊ាននិយាយថា ខ្មែរក្រហមបានធ្វើឱ្យបាត់ បង់ចំណែកដីខ្មែរទៅឱ្យបរទេសទេ។ ទាំងនេះហើយជាចំណុចដែលគេមើល ឃើញថា ការគ្រប់គ្រងអំណាចរបស់ពួកខ្មែរក្រហមគ្រាន់បើជាងការគ្រប់គ្រងរបស់ ហ៊ុន សែន បច្ចុប្បន្ន ដែលគេឮសូរតែសម្លេងរាស្ត្រខ្មែរយំស្រែក ពីការដែលគេឆក់ប្លន់យកដីធ្លី អំពើពុករលួយ អំពើ ឃោរឃៅ ការធ្មេចភ្នែកទុកឱ្យបរទេសជិតខាងរំលោភទន្ទ្រានយកដី៘
ជាមួយគ្នាដែរ ជារបៀបលើកជើង លោក ផៃ ស៊ីផាន បានធ្វើជានិយាយបន្ទរដល់អ្វីដែល ជាកំហឹងរបស់លោក ហ៊ុន សែន ដែលធ្លាយចេញយ៉ាងគ្រោតគ្រាតកាលពីពេលថ្មីៗនេះទៅ លើក្រុមអ្នកប្រឆាំង ដែលក្នុងនោះរាប់មានទាំងលោក ប្រេដអាដាម នាយកអង្គការសិទ្ធិមនុស្ស អាស៊ី លោកបណ្ឌិត ឡៅ ម៉ុងហៃ ដោយបានផ្តល់រហ័ស្សនាមអ្នកទាំងនោះថា ជាក្រុមបិសាច។ ជាបិសាចដែលបានរំខានដល់ការគ្រប់គ្រងអំណាចតាមបែបផ្តាច់ការបច្ចុប្បន្ន របស់ក្រុមបក្ស ប្រជាជន ដែលក្នុងនោះមានខ្លួនម្នាក់ដែរ ដែលទទួលបានផលប្រយោជន៍ និងតួនាទីពីកំអែល អំណាចរបស់បក្សនេះ។
ការលើកឡើងរបស់លោក ឡៅ ម៉ុងហៃ ដែលជាការក្រើនរំលឹកមេដឹកនាំខ្មែរឱ្យ គិតគូ ពីកាតព្វកិច្ចរបស់ខ្លួន និងជាការផ្តល់សញ្ញាផ្លូវសម្រាប់ពលរដ្ឋកម្ពុជា ឱ្យទៅមើលឃើញស្ថានភាពនៅប្រទេសទុយណេស៊ី ដែលប្រហាក់ប្រហែលនឹងខ្មែរ ប៉ុន្តែទីបំផុតទៅពលរដ្ឋទុយណេស៊ីបានដណ្តើមឯករាជ្យ ហើយមេដឹកនាំផ្តាច់ការពុករលួយ បេន អាលី បានរត់គេចខ្លួនផះក្រញាំទៅក្រៅប្រទេស។ ដែលការបញ្ចោញទស្សនៈនេះ បានធ្វើឱ្យ ហ៊ុន សែន ខ្លួនឯងផ្ទាល់មានការភ័យខ្លាចរអើលខ្នងយ៉ាងខ្លាំង ហើយក៏បានក្លាយទៅជាផ្នែក មួយធ្វើឱ្យលោក ផៃ ស៊ីផាន ព្យាយាមទាំងខុសរឿងដើម្បីធ្វើការវាយប្រហាបកទៅលោក ឡៅ ម៉ុងហៃ តាមរបៀបឆៅៗ។
ប៉ុន្តែបើទោះជាដូច្នេះក្តី ក្នុងចំណោមអ្នកហៅទូរស័ព្ទចូលទាំងអស់កាលពីម្សិលម៉្ងៃនោះ គេកត់សម្គាល់ឃើញថា មានម្នាក់បានលើកសំនួរសើយទៅវិញថា បើបក្សប្រជាជន និង លោក ហ៊ុន សែន មានការគាំទ្រពីប្រជាពលរដ្ឋខ្មែរមហិមារប៉ុណ្ណឹង ចុះចាំបាច់អីទៅភ័យខ្លាច គ្រាន់តែការលើកឡើងជាទស្សនៈបែបលោក ឡៅ ម៉ុងហៃ នោះ។ ដែលសំណួរនេះវាបាន ធ្វើឱ្យលោក ផៃ ស៊ីផាន ជាវាគ្មិន បង្វិលគូថចុះឡើងលើកៅអី ហាក់ដូច ជាចង់ពាំត្រណោតជាន់កន្ទុយខ្លួនឯង រហូតដល់ជាន់ដោយទាំងមេគាត់ឱ្យដួលផ្កាប់មុខទាំងជំហរតែម្តងហើយ៕
No comments:
Post a Comment