ចាប់ពីពាក់កណ្តាលខែធ្នូ ឆ្នាំ២០១០ ប្រជាពលរដ្ឋ ទុនណេស៊ី រាប់ម៉ឺននាក់ បានធ្វើបាតុកម្មបណ្តេញ ប្រធានាធិបតី Zine El Abidine Ben Ali ចេញពីតំណែង ដោយសារតែអំពើពុករលួយ ភាពគ្មានការងារធ្វើកាន់តែរីករាលដាលនៅក្នុងប្រទេស។ ដោយមិនអាចទ្រាំទ្របាន មេដឹកនាំផ្តាច់ការរូបនេះ បានរត់ភៀសខ្លួនទៅក្រុង Dubai ប្រទេស Arab Emirates ។ កំសួលភ្លើង បានកំពុងសាយភាយចូលទៅដល់ប្រទេសអេហ្ស៊ីប និងប្រទេសយេមែន។ ដោយមានគោលដៅដូចជនជាតិ ទុនណេស៊ី ដែរ ជនជាតិអេហ្ស៊ីប កំពុងទាមទារអោយលោកប្រធានាធិបតី Hosni Bubarak ហើយជនជាតិយេមែន ទាមទារអោយលោក ប្រធានាធិបតី Ali Abdullah Saleh ចុះពីតំណែង ដោយសារតែអ្នកទាំងពីរត្រូវរងចោទប្រកាន់ពីបទពុករលួយ និងផ្តាច់ការ។ នៅក្នុងក្រុងហ្សាណាប្រទេសយេមែន បាតុករប្រមាណ១៥០០០នាក់ កំពុងតែប្រមូលផ្តុំគ្នាបណ្តេញលោក Saleh ដែលកាន់អំណាចជាង៣០ឆ្នាំ អោយចេញពីតំណែង។ មេដឹកនាំរូបនេះ រងនូវការរិះគន់ពីការរៀបចំកាន់អំណាចអស់មួយជីវិតតាមច្បាប់ ហើយមានគំរោងប្រគល់អំណាចទៅអោយកូនប្រុសច្បង ដែលជាមេអង្គរក្ស។ អ្នកតាមដានស្ថានការណ៏នយោបាយអះអាងថា មិនយូរប៉ុន្មានឡើយ មេដឹកនាំទាំងនេះនឹងមានវាសនា ដូច Ben Ali ។ ប្រភពព័ត៌មានចុងក្រោយអោយដឹងថា ភរិយា និងកូនប្រុសលោក Bubarak បានរត់ភៀសខ្លួនទៅកាន់ប្រទេសអង់គ្លេសហើយ។
នៅកម្ពុជា លោកនាយករដ្ឋមន្ត្រី ហ៊ុន សែន ដែលកាន់អំណាច២៦ឆ្នាំ ក៏មានរឿងអាស្រូវមិនតិចជាង បណ្តាមេដឹកនាំផ្តាច់ការនៅអាហ្វ្រិកខាងជើងប៉ុន្មានដែរ ពោលគឺសឹងតែច្រើនជាង ច្រើនដងផង ប៉ុន្តែលោកតែងប្រកាសថា នឹងកាន់អំណាចរហូតដល់អាយុ៩០ឆ្នាំ។ មិនខុសពីលោក Saleh ឡើយ លោក ហ៊ុន សែន មានកូនប្រុសច្បងដែលកាន់តួនាទីជាមេបញ្ជាការរងកងអង្គរក្ស និងជាមេបញ្ជាការរងកងទ័ពជើងគោក ដែលគេសង្ស័យថា កំពុងរៀបចំផ្លូវអោយកូនប្រុសឡើងកាន់អំណាចដូចមេដឹកនាំកូរ៉េខាង ជើង។ ជាមួយពាក្យគំរាម «បិទទ្វារវ៉ៃឆ្កែ» លោក ហ៊ុន សែន ព្រមានពីការប្រើកម្លាំងប្រដាប់អាវុធបង្ក្រាបក្រុមអ្នកតវ៉ាទុកជា មុន បើសិនជាមានបាតុកម្មប្រឆាំងរូបលោក។ ពិភពលោកកំពុងតែវិលដោយគ្រវាត់គ្រវែងពពួកមេដឹកនាំផ្តាច់ការម្តង មួយៗ ប្តូរវេនគ្នា ដោយគ្រាន់តែមិនដឹងពេលណាតែប៉ុណ្ណោះ។ អំណាចប្រជាពលរដ្ឋខ្លាំងជាងចុងកាណុង ហើយទឹកចិត្តអ្នកស្រេកឃ្លានប្រជាធិបតេយ្យ ក៏ខ្លាំងជាងរថក្រោះ នៃជនផ្តាច់ការផងដែរ៕
No comments:
Post a Comment